دئمرم
اوليندن عادتيم دير سؤزده يالان دئمرم
من توركجه دانيشارام ديله زبان دئمرم
آنام مني اوشاقليقدا تورك ديلي دانيشديريب
آتام منه چؤره ك وئريب چؤره گه نان دئمرم
من آنامين امجگيندن توركجه سود امميشم
ايندي ده امجك دئييرم داحي پستان دئمرم
سو ايچنده ذوق ائده رم داد وئرمز آغزيمدا آب
سرين له سم كؤلگه ليكده دا سايبان دئمرم
دريالاردا گمي لري گزديرر گميچي لر
چوخ گؤزل دير گميچي ليك دا كشتيبان دئمرم
ائو ـ ائشيگيم ايشيقلانار قوناقلاري گؤرنده
من قوناغي چوخ سئورم آمما مهمان دئمرم
آنام منه دون تيكردي سيريق ـ سيريق آرخاليق
كؤينگيمين اتگينه داحي دامان دئمرم
اوول ائوده اوشاقلارا تورك ديليني اؤيره دزم
آنا يا آنا دئيه رم دا مادرجان دئمرم
بير گؤزه لي تعريف ائتسم توركوجه سؤز قوشارام
كيپريگين اوخ قاشلارين ياي، ابرو كمان دئمرم
بئشيگه گهواره دئمم او مني ييرقالاييب
صوبحه كيمي گودوكچويه من نگهبان دئمرم
قونشويا همسايه دئمم من يولداشا دا همراه
اوغولا اوغول دئيه رم هئچ پسر جان دئمرم
اكينچي يم يوخ كشاورز، تورپاغا خاك دئمرم
اولدوزا ستاره دئمم گؤيه آسمان دئمرم
گؤي گورولدار ياغمور ياغار ياشيل لانار يايلالار
هر نه قدر ياغيش ياغسا اونا باران دئمرم
دگرلي يه دگر وئررره م ارزشدن چيخماز باشيم
اوجوزا اوجوز دئيه رم داحي ارزان دئمرم
آتا ـ بابام تورك دور منيم توركجوجه دانيشارام
فارسي دا خوش شيرين ديلدير خوشا يامان دئمرم
دده كاتب تورك اوغلويام چوخ دادلي دير ديليميز
ماهي يه باليق دئيه رم سونا پايان دئمرم.
شعر دده كاتب:نئت اوچون حاضيرلايان آيتام اورمولو
گؤنده ر
بؤلوم لر:
توركجه شعر
بوگونون گؤروشو : نفر
دونه نین گؤروشو : نفر
بوتون گؤروش لر : نفر
بو آیین گؤروشو : نفر
باخیش لار :
یازی لار :
یئنیله مه چاغی : ....